Svæðistónleikar NÓTUNNAR, uppskeruhátíðar tónlistarskóla, fyrir Vestfirði og Vesturland verða haldnir í Tónbergi, sal Tónlistarskólans á Akranesi laugardaginn 10.mars. nk.
Eftir forval í hverjum tónlistarskóla koma fulltrúar skólanna fram á svæðistónleikum sem haldnir eru á fjórum stöðum á landinu: Höfuðborgarsvæðinu, Vesturlandi/Vestfjörðum, Norður/Austurlandi og Suður/Suðvesturlandi. Á svæðistónleikunum velur sérstök dómnefnd nokkur atriði sem fá sérstakar viðurkenningar og örfá atriði sem fá rétt til að leika á lokatónleikum hátíðarinnar sem haldnir verða i Eldborgarsal Hörpu í Reykjavík sunnudaginn 18.mars.
Uppskeruhátíðin NÓTAN er opin öllum tónlistarnemendum og hefur engin aldursmörk. Þátttakendum er skipað í flokka eftir áfangaskiptingu aðalnámskrár tónlistarskóla þ.e. í grunnnám, miðnám og framhaldsnám. Allar stíltegundir tónlistar og hljóðfærasamsetningar eru gjaldgengar, einungis þarf að taka mið af áfangaskiptingu aðalnámskrár. Þetta er í 3.skipti sem hátíðin er haldin.
Fulltrúar Tónlistarskóla Ísafjarðar í svæðistónleikunum að þessu sinni eru bræðurnir Nikodem Júlíus Frach og Mikolaj Ólafur Frach. Nikodem ætlar að keppa í einsöng á grunnstigi og flytur Vókalísu eftir K. Dambski. Undirleikarar eru Maksymilian Haraldur Frach (fiðla) og Mikolaj Ólafur Frach (píanó). Mikolaj, sem er í framhaldsstigi, spilar hinn fræga Menúett í G-dúr eftir pólska tónskáldið og píanóleikarann Ignacy Paderewski. Paderewski var reyndar ekki síður þekktur og vinsæll sem stjórnmálamaður og var um tíma forsætisráðherra Póllands.
Skólarnir sem taka þátt í svæðistónleikunum 2012 eru:
Tónlistardeild Auðarskóla í Dölum
Tónlistardeild Súðavíkurskóla
Tónlistardeild Hólmavíkurskóla
Tónlistarskóli Borgarfjarðar
Tónlistarskóli Ísafjarðar
Tónlistarskóli Snæfellsbæjar
Tónlistarskóli Stykkishólms
Tónlistarskólinn á Akranesi
Tónlistarskóli V.Húnvetninga.