Á morgun, uppstigningardag 13. maí kl. 16:00, flytur Kammerkórinn á Ísafirði ásamt 5 manna strengjasveit Messu í G-dúr eftir Schubert í Ísafjarðarkirkju ásamt einsöngvurunum Ingu Backmann sópran, Þorgeiri Andréssyni tenór og Sigurði Skagfjörð Steingrímssyni bassa. Í upphafi tónleikanna munu þær Guðrún Jónsdóttir sópran og Ingunn Ósk Sturludóttir mezzo-sópran flytja nokkra kafla úr Stabat Mater eftir Pergolesi ásamt strengjasveitinni. Tónleikar þessir eru til heiðurs Kvenfélagi Ísafjarðarkirkju sem er 50 ára um þessar mundir og ennfremur Ísafjarðarkirkju sem á 15 ára vígsluafmæli sem þakklætisvott fyrir æfingaaðstöðu. Stjórnandi Kammerkórsins er Guðrún Jónsdóttir og hljómsveitarstjóri er Janusz Frach. Aðgangur á tónleikana er ókeypis.