Hinn 13. apríl sl. voru 140 ár liðin frá fæðingardegi Jónasar Tómassonar, en í ár eru 110 ár síðan hann stofnaði Tónlistarskóla Ísafjarðar hinn fyrri, sem talinn er hafa verið fyrsti tónlistarskóli á landinu. Hann var starfræktur í fjögur ár og þar voru námsgreinarnar söngur, tónfræði, orgel-leikur og kynning tónskálda. En 1918 hafði fyrri heimsstyrjöldin geisað og Spænska veikin hafði lagt samfélagið í dvala. Það var því bið á að Jónas hæfist handa um stofnun nýja skólans, en smám saman byggðist upp gott sönglíf í kirkjunni, þar sem Jónas var organisti. Hann stofnaði Karlakórinn 1922 og Sunnukór 1934 og stóð fyrir margvíslegum viðburðum og tónleikum.

Stofnfundur Tónlistarfélagsins var haldinn 1948 að heimili Jónasar í Hafnarstræti 2, m.a. með það fyrir augum að stofna tónlistarskóla, halda uppi almennri tónlistarstarfsemi, svo sem með því að fá hingað tónlistarmenn til tónleikahalds. Jónas hafði sent Ragnari H. Ragnar bréf 1947 og óskað eftir því að hann veitti forstöðu skóla, en ráðningin dróst um ár vegna undirbúnings hjónanna.

Frumkvöðlarnir tileinkuðu starfinu alla sína krafta í þeirri trú að hægt væri að byggja upp tónlistarskóla á Isafirði. Þetta starf hefur kostað svita og tár í áranna rás og mun starf þeirra seint fullþakkað af þeirri kynslóð er við tók. Árangurinn hefur skilað sér í uppeldi nokkurra kynslóða í gefandi og þroskandi samneyti við tónlistina.

Anna Ingvarsdóttir, Jónas Tómasson og sonur þeirra Ingvar Jónasson.

 

Anna og Jónas spila á píanó og orgel.

Í Tónlistarskólanum er einstaklega fallegur bókaskápur sem var í eigu Jónasar Tómassonar. Skápurinn er fullur af bókum, nótum, bæklingum og öðrum tónlistar dýrgripum, sumum fágætum.

 

Lítið brot af dýrgripunum í skáp Jónasar